Հայ-ղազախստանյան միջկառավարական հանձնաժողովի նիստի մասին

29 ապրիլի, 2023

Ս․թ․ ապրիլի 28-ին Երևանում Հայաստանի Հանրապետության փոխվարչապետ Մհեր Գրիգորյանի և Ղազախստանի Հանրապետության փոխվարչապետ - առևտրի և ինտեգրման նախարար Սերիկ Ժումանգարինի գլխավորությամբ կայացել է Տնտեսական համագործակցության հայ-ղազախստանյան միջկառավարական հանձնաժողովի 9-րդ նիստը։

Նիստին երկուստեք ընդգծվել է դրական միտումով, ինչպես նաև մետալուրգիայի, գյուղատնտեսության, դեղագործության, տեղեկատվական, տրանսպորտի, էներգետիկայի, զբոսաշրջության ոլորտներում նոր «հնարավորությունների պատուհաններով» աչքի ընկնող երկկողմ տնտեսական համագործակցության ներուժի ավելացման կարևորությունը։

Այս համատեքստում հայաստանյան կողմը ընդգծել է մասնավորապես իր հետաքրքրվածությունը Հայաստանում անցկացվող շինարարական աշխատանքներին և տենդերներին, ինչպես նաև Գյումրիում լոգիստիկ կենտրոնի (dry port) ստեղծման նախագծում ղազախստանյան ընկերությունների մասնակցության մասով։ Իր հերթին՝ ղազախստանյան կողմը տեղեկացրել է դեպի Հայաստան 270 մլն ԱՄՆ դոլար ծավալով գնահատվող հումքի և պատրաստի արտադրանքի արտահանման հնարավորության մասին։ Քննարկվել են նաև ՏՏ և զբոսաշրջության ոլորտներում, այդ թվում՝ Հայաստանի և Ղազախստանի միջև ուղիղ ավիաչվերթների քանակի ավելացման միջոցով համագործակցության ընդլայնման հարցերը։ Դիտարկվել են նաև Աստանայում հայկական ԹՈՒՄՈ ստեղծարար տեխնոլոգիաների կենտրոնի մասնաճյուղ հիմնելու և Երևանում «Աստանա» միջազգային ֆինանսական կենտրոնի մասնաճյուղի բացման հարցերը։

Քննարկումների արդյունքներով ընդունվել է արձանագրություն, ինչպես նաև ստորագրվել է 2023-2025թթ․ մշակույթի ոլորտում երկկողմ համագործակցության ծրագիրը։

Հանձնաժողովի նիստին ընդառաջ ս․թ․ ապրիլի 24-ին կայացել է երկկողմ գործարար համաժողով, որի առցանց աշխատանքներին մասնակցել են մոտ 50 հայաստանյան և ղազախստանյան խոշոր գործարար, ազգային հոլդինգներ և գործարար շրջանակների ներկայացուցիչներ։

Ի գիտություն՝ 2022թ․ արդյունքներով երկկողմ ապրանքաշրջանառության ծավալը կազմել է 42 միլիոն ԱՄՆ դոլար, ինչը 99,8%-ով գերազանցում է 2021թ․ նույն ժամանակահատվածի ցուցանիշները։ 2023թ․ հունվար-փետրվար ամիսներին երկկողմ առևտուրը նույնպես աճել է 81,8%-ով՝ կազմելով 4,6 մլն ԱՄՆ դոլար։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր